Momente frike për mbrojtësin e Bayern Munich, Breno. Të hënën gjatë natës, lojtari brazilian i ka shpëtuar pa shumë dëmtime një zjarri të madh që ka përfshirë vilen e tij luksoze në periferi të Mynihut. Breno ka arritur ta dalë në kohë nga shtëpia pas rënies së zjarrit, arsyet e të cilit mbeten ende për t’u sqaruar nga ana e policisë bavareze. Ndërkohë futbollisti në fjalë është përcjellë në spital ku ka marrë ndihmën e parë mjekësore për probleme me frymëmarrjen. Fatmirësisht gjithçka ka kaluar me kaq për Brenon në një kohë që duke marrë në konsideratë përmasat gjigande të zjarrit dhe shpejtësinë me të cilën janë përhapur flakët në vilën luksoze mund të kishin sjellë pasoja edhe më të rënda për lojtarin e talentuar të Bayern Munich.

Ish-futbollisti i klubit brazilian San Paolo ishte vetëm në shtëpi ndërsa gruaja e tij dhe tre fëmijët kanë mbërritur pranë shtëpisë në një kohë që vila e shtrenjtë, ku banonte familja Breno ishte duke u shkrumbuar totalisht nga flakët. Shtëpia e mbrojtësit të Bayern Munich, e cila ndodhej në Grunvald, në periferi të Mynihut, u shkatërrua plotësisht dhe zjarrfikësit nuk mund të shpëtojnë thuajse asgjë nga vila luksoze. Dëmet sipas policisë arrijnë shifrën 500 mijë euro. Ndërkohë i pari nga shokët e skuadrës së Brenos që ka mbërritur në vendngjarje ka qenë braziliani tjetër, Rafinha, i cili banonte pranë familjes Breno