Java e katërt e Primera Division ka dhuruar një suprizë të madhe, humbjen e Realit të Madridit 1-0 në transfertë kundër Levantes. Një disfatë e papritur për Joze Mourinho, i cili para ndeshjes ironizonte, me trajnerin e Barcelonës, Guardiola duke deklaruar se skuadra e tij në këtë sezon luftonte për të mbijetuar në kampionat. Dhe të paktën për këtë javë të kampionatit Reali i Madridit iu përshtat deklaratave të trajnerit të vet duke luajtur si një skuadër inferiore në “Ciudat de Valencia” kundër Levantes. Mourinho e nisi ndeshjen duke lënë në stol Ronaldon e dëmtuar në Champions kundër Dinamos së Zagreb si dhe Higuain e Ozil për t’i besuar Rikardo Kakasë.
Ky i fundit së bashku me Benzema humbasin të paktën katër raste të mira në pjesën e parë përpara se Khedira të lërë me 10 lojtarë Realin e Madridit në minutën e 40-të pas përfshirjes në një zënke me Ballesteros duke marrë kartonin e dytë të verdhë.
Edhe në pjesën e dytë Levante mendon më shumë për mbrojtjen, por në kundërsulm skuadra vendase është tepër e rrezikshme. Juanlu në minutën e 65-të shkon fare pranë golit derisa 3 minuta më vonë Aruna Kone brenda zone lëshon një të djathtë potente që mposht Casillas. Me Ronaldon, Higuain dhe Ozil të futur në pjesën e dytë në fushë Reali përpiqet që të barazojë por nuk ka qartësinë e duhur në sulm ndërsa, vendasit festojnë fitoren e dytë të tyre në histori në kampionat kundër madrilenëve.
Pas fitores së Barcelonës 8-0 kundër Osasunës , katalanasit kanë 7 pikë ndërsa Reali 6 pikë. Fitore e bukur edhe për Ateltico Madrid, e cila mundi 4-0 Racing Santander falë një triplete të Falcaos dhe një goli të Adrian në minutën e 78-të. Vazhdon surpriza Betis Sevilla, e cila ka marrë një fitore të shkëlqyer 2-3 në transfertë kundër Athletic Bilbaos. Betis është tani në vendin e parë me 9 pikë së bashku me Valencian.
0 σχόλια:
Δημοσίευση σχολίου